Afg‘oniston janubida «Tolibon» jangarilariga qarshi keng miqyosli harbiy harakatlar boshlandi, deya xabar beradi Britaniyaning «Sky News» telekanali.

«Mushtarak» deb nomlangan ushbu operatsiyada AQSh, Buyuk Britaniya va Afg‘onistonning jami 15 ming harbiylari ishtirok etishi ko‘zda tutilgan. Dala qo‘mondonlarining gaplariga qaraganda, ular Xilmond muzofotida 2 mingga yaqin jangarining qarshiligiga uchrashi mumkin. Bu jangarilar orasida xorijiy yollanma askarlar ham bor.

Harbiy operatsiyalar olib borilayotgan Marja shahri va uning atrofida yashovchi aholining 80 minggi o‘z yashash manzillarini tashlab chiqib ketdi. Ammo jangarilar aholining ketishiga to‘sqinlik qilmoqda. Aftidan ular tinch aholidan tirik qalqon sifatida foydalanishni rejalashtirishgan. Ta’kidlash lozimki, «Mushtarak» harbiy harakatlari 2001 yildan beri davom etayotgan tolibonlarga qarshi kurashdagi eng yirik harbiy operatsiyadir.