Охирги сонда



Кўп ўқилган мақолалар



Долзарб мавзу



Мақолалар архиви

«    Iyun 2020   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
17.03.2020

ТИББИЁТ СОҲАСИДАГИ ИЛМИЙ ИЗЛАНИШЛАР

натижалари амалиётга жорий қилинмоқда

Миллий матбуот марказида Вазирлар Маҳкамаси ҳузуридаги Олий аттестация комиссияси томонидан «Тиббиёт фанлари соҳасида олий малакали илмий ва илмий-педагог кадрлар аттестацияси натижалари» мавзуида брифинг ўтказилди. Унда тиббиёт соҳасининг етакчи олимлари, илмий изланишлар олиб бораётган ёш тадқиқотчилар иштирок этди.

Брифингда сўнгги йилларда тиббиёт фанлари соҳасида ҳимоя қилинган диссертация ва тадқиқотлар натижалари тўғрисида сўз юритилди. Шунингдек, Президентимизнинг Олий Мажлисга Мурожаатномаси ҳамда «Илм, маърифат ва рақамли иқтисодиётни ривожлантириш йили» Давлат дастурида белгиланган устувор вазифалар ижроси юзасидан амалга ошириладиган ишлар, жумладан, соғлом турмуш тарзини шакллантириш, оналик ва болаликни муҳофаза қилиш борасидаги илмий тадқиқотларни ташкил этиш бўйича қилинаётган ишлар хусусида маълумотлар берилди.

— Президентимизнинг Олий Мажлисга Мурожаатномасида соғлиқни сақлаш тизимини янада ривожлантириш борасида белгилаб берилган вазифалари репродуктив ёшдаги, ҳомиладорлик ва туғруқдан кейинги даврдаги аёллар, янги туғилган чақалоқлар, болалар орасида учрайдиган касалликларни эрта ташхислаш, скрининг қилиш, даволаш ва профилактик чораларини кўришга бағишланган илмий изланишлар кўламини янада кенгайтириш масалага алоҳида эътибор қаратилган, — дейди Тошкент педиатрия тиббиёт институти проректори Қаҳрамон Ҳаитов. — Хусусан, охирги уч йилда аёлларнинг репродуктив саломатлиги, оналик ва болаликни муҳофаза қилиш муаммоларининг ечимига қаратилган акушерлик ва гинекология, педиатрия, дерматовенерология мутахассисликлари бўйича 39 та тиббиёт фанлари бўйича фалсафа доктори ҳамда 27 фан доктори тайёрланган.

Бундан ташқари, тиббиётнинг репродуктив саломатлик, оналар ва болалар соғлиғини муҳофаза қилиш борасида фан доктори ва фалсафа доктори талабгорлари илмий изланишлари ҳамда уларнинг натижалари амалиётга жорий қилинмоқда. Жумладан, бу изланишлар муддатига етмай туғилган чақалоқларда овқат ҳазм қилиш тизими ўзгаришларини ташхислаш ва даволашни янги усулларини ишлаб чиқиш, аниқланган бузилишларни ўз вақтида даволаш, ичак касалликлари ривожланишини башоратлаш, шу билан бирга болаларнинг ўпка касалликларида жисмоний ва жинсий ривожланишдан ортда қолишнинг хусусиятларини аниқлаш ва босқичли иккиламчи профилактика чора-тадбирларини қўллаш, ремиссия муддатини узайтириш, асоратларини камайтириш ҳамда даволаш муддатларини қисқартириш каби имкониятларни яратмоқда.

— Бугунги кунда профилактик тиббиёт йўналишида ҳимоя қилинган диссертациялар соҳада белгиланган вазифаларга монанд амалга оширилмоқда, — дейди Тошкент тиббиёт академиясининг кафедра мудири Низом Эрматов. — Жумладан, диссертациялар соғлом турмуш тарзини ташкил қилишнинг илмий асосларини такомиллаштириш, аҳолини хавфли юқумли касалликлардан самарали муҳофаза қилиш, маҳаллий маҳсулотларнинг озуқавий ва биологик қийматини баҳолаш, шунингдек, аҳолининг санитария-эпидемиологик осойишталигини таъминлаш, ихтисослаштирилган тиббий ёрдам кўрсатишни сифат жиҳатдан ривожлантириш каби муҳим йўналишларда амалга оширилмоқда.

Янада аниқроқ айтадиган бўлсак, илмий-изланишлар натижасида аҳолининг турли қатламлари орасида темир ва йод танқислиги касалликларининг олдини олиш ва камайтиришда муҳим аҳамиятга эга бўлган темир ва йод моддалари билан нон ҳамда қандолат маҳсулотларининг озуқавий, физик-кимёвий ва биологик қийматини бойитиш бўйича тавсиялар ишлаб чиқилди. Улар организмнинг биологик темир ва йод захирасини янада бойитишга, касалликни муайян даражада камайтиришга хизмат қилмоқда.

Брифингда аттестация комиссияси томонидан ўтган йилда амалга оширилган ишлар жорий йилда ҳам давом эттирилиши, аҳоли саломатлигини сақлаш борасидаги ишлар янги босқичга олиб чиқилиши таъкидланди.

 

Ирода ҒОФУРОВА.


Фикр ва мулохазалар

Защита от автоматических сообщений

Сўнгги янгиликлар: