Ўзбекистон — Корея Республикаси ўртасидаги ўзаро муносабатлар йилдан йилга кенгайиб, мустаҳкам­ланиб бормоқда. Эътиборли жиҳати шундаки, энди ҳар икки мамлакатнинг айрим шаҳарлари тўғридан-тўғри иқтисодий, маданий алоқалар ўрнатиб, турли соҳаларда ҳамкорликни йўлга қўймоқда. Бу борада Фарғона вилоятидаги ишлар эътиборга лойиқдир. 2012 йил якуни бўйича вилоятнинг Корея Республикаси билан ташқи савдо айланмаси 50,3 миллион АҚШ долла­рини ташкил этди. Бу 2011 йилга нисбатан бир ярим баробар ортиқдир.

Ушбу кўрсаткич жорий йилда янада сезиларли даражада ўсиши кутилмоқда. Гап шун­даки, вилоят ҳокимлигининг ташаббуси билан Корея Республикасининг Ёнгин ва Ёнсангу шаҳри тадбиркор, ишбилар­мон ҳамда ишлаб чиқарувчилари ўртасида тажриба алмашиш, ҳамкорликда янги корхоналар ташкил этиш, инвестиция киритиш каби йўналишларда жадал ишлар олиб борилмоқда.

2012 йилда дастлаб Ёнгин шаҳри мэри Ким Хак Куй бошчилигидаги делегация Фарғона вилоятида бўлди. Ташриф доирасида иқтисодий алоқаларни ривожлантириш ҳамда туризм соҳасида ҳамкорликни амалга оширишга келишиб олинди. Сўнгра Фарғона вилояти делегация­си Корея Республикасига сафар уюштирди. Унда Президентимиз Фармонида бел­гилаб берилган имтиёзлар, вилоятнинг инвестицион имкониятлари ҳақидаги тақдимот  учрашув ва семинарларда намойиш этилди. Натижада, ўзимизнинг маҳаллий тад­биркорлар билан ҳамкорлик қи­лиш истагини билдирган бир қа­тор компаниялар ўртасида алоқалар ўрнатилди. Ошхона жиҳозлари ишлаб чиқарувчи «Seongchan Benifica Co.,Ltd.», кондиционер ва иситиш мосламалари ишлаб чиқарувчи «SEL Air Conditioning Co.,Ltd.», пластмассадан турли маҳсулотлар тайёрлайдиган «Gum­myeong Idustry», тайёр текс­тиль ва ётоқхона буюмлари ишлаб чиқариш ускуналарини етказиб берувчи «Micro Corpo­ration» компаниялар, шунинг­дек, деҳ­қон хўжаликлари учун томчилаб суғорувчи ускуналарга ихтисослашган «Cell­tirion» компаниялар шулар жумласидан.

Ўтган йил охирида ишлаб чи­қарувчилар ва хорижий ишбилармонлар ўртасида ўзаро манфаатли ҳамкорлик ўрнатиш мақсадида вилоят ҳокимлигининг таклифи билан ўтка­зилган ҳудудий саноат ярмар­касига Франция, Корея ҳамда республикамизда фаолият юритаётган хорижий компаниялар вакиллари иштирок эт­ди. Ярмаркада 9 миллион АҚШ дол­ларидан ортиқ миқдорда экспорт шартномалари тузилди.

Ёнсангу шаҳар маъмурияти билан олиб борилган музокаралар туфайли 2012 йилнинг 6-7 ноябрь кунлари Ёнсангу шаҳар мэри Сунг Жанг Хюн бошчилигидаги делегациянинг Фарғона шаҳрига ташрифи амалга оширилди. Юртимизда Наврўз байрами нишонланаётган паллада эса Ёнгин шаҳрининг 20 нафарга яқин тадбиркор ва ишлаб чиқарувчилари яна Фарғонага келдилар.

— Бу гал аниқ йўналишлар бў­йича ҳамкорлик режаси ишлаб чиқилди, — дейди делегация раҳбари, Ёнгин шаҳар мэри ўринбосари Хонг Сеунг По жаноблари. — Яна бир не­ча ойдан сўнг фарғоналик тад­биркорларнинг Корея Республикасига сафари чоғида вилоятингизга тўғридан-тўғри инвестиция киритиш, янги қўш­ма корхоналар ташкил этиш ҳақидаги амалий шартномалар имзоланади.

Дарвоқе, ҳозирда Фарғона вилоятида Корея сармояси иштирокида 8 та қўшма кор­хона ташкил этилган. Улар то­монидан биргина ўтган йилда 97 млн АҚШ доллари миқ­дорида экспорт амалга оширилди.

Меҳмонлар «UZ Sangwoo», «Турон текс­тиль», каби корхоналар фаолияти билан танишди. Шунингдек, Марғилон, Қувасой, Қўқон ша­ҳарларида бўлиб, ҳунармандлар кўргазмаларида иштирок этди. Тарихий обидаларга саё­ҳат уюштирилди. Ташриф чоғида кореялик ҳамда фарғоналик тадбиркор ва иш­билармонлар учун «Бизнес форум» ўтказилди.

Муҳаммаджон ОБИДОВ,

«Ўзбекистон овози» мухбири.