23.12.2019

МАМЛАКАТ ТАРАҚҚИЁТИ ВА ХАЛҚ ФАРОВОНЛИГИ УЧУН ОВОЗ БЕРДИК

Ўзбекистон Республикаси Олий Мажлиси Қонунчилик палатаси ва халқ депутатлари маҳаллий Кенгашлари депутатлигига ўтказилган сайловларда Ўзбекистон Қаҳрамонлари ҳам фаол қатнашди.

Азим ЛАТИПОВ, Шофиркон туманидаги “Азим Шофиркон юлдузи” фермер хўжалиги раҳбари, сенатор, Ўзбекистон Қаҳрамони:

— Ҳаёт янада ривожланишни тақозо этади. Бу демократик янгиланишларнинг муҳим жиҳати ҳамдир. Мен кўплаб сайловларда иштирок этганман. Аммо бу галги сиёсий тадбир улардан тубдан фарқ қилди. Унинг демократик талабларга ҳар томонлама ҳамоҳанг янги қонун ҳужжати асосида ўтгани қувонарли.

Ислоҳотларни чуқурлаштириш унинг ҳуқуқий асосларига боғлиқ. Бунда эса вакиллик органларига ташаббускор, фидойи, бюрократик ғовларга қарши қатъият кўрсатадиган кишилар келиши муҳимдир. Сайловчиларнинг фаоллиги уларнинг жамиятда кечаётган жараёнларга дахлдорлик туйғуси ошиб бораётганини кўрсатди.

Абдимурод БОЗОРОВ, сенатор, Ўзбекистон Қаҳрамони:

— Бизнинг ёшдаги одамларда бир неча сайловларни солиштириб кўриш имкони бор. Бу галги сайловни аввалгилари билан таққосласак, катта фарқ сезилиб турибди. Сайлов кодекси қабул қилиниши нақадар ҳаётий зарурат бўлганини сайлов чоғида овоз бериш учун келган одамларнинг кайфиятидан ҳис қилдим. Очиғи, сенатор сифатида кодекснинг қабул қилинишида иштирок этганимдан қувониб кетдим. Участкада овоз бериш жараёни юқори савияда ташкил қилинибди. Ҳеч қандай оворагарчиликсиз ўзим танлаган номзодларга овоз бердим.

Лолахон МУРОТОВА, Олтиариқ туманидаги “Нурли обод” фермер хўжалиги раҳбари, Ўзбекистон Қаҳрамони:

– Олтиариқ тумани “Қапчуғай” маҳалла фуқаролар йиғинидаги 853-сайлов участкасига келиб, ўзим муносиб деб билган номзодлар учун овоз бердим.

Бу йил янгича сайловлар бўлди, 5 та сиёсий партиянинг иштирок этгани, улар ўртасида рақобатнинг кучайгани ва халқимизнинг бу жараёнга бефарқ эмаслиги ҳам буни кўрсатиб турди. Халқимиз ўз ҳуқуқидан фойдаланиб, ўзи танлаган, ўзи муносиб билган номзод учун овоз берди. Мен ҳам эртанги кунимга бефарқ эмасман. Юртимизнинг тинчлиги, халқимизнинг фаровонлиги учун овоз бердим. Ўзим ҳам илк марта 1980 йилда вилоят кенгаши депутатлигига номзод сифатида кўрсатилиб, сайланганман. Мустақилликдан кейин ҳам 2 марта вилоят кенгаши депутати бўлдим. Депутатликнинг юки ниҳоятда оғир. Халқнинг ишончини оқлаш учун тинимсиз меҳнат қилиш керак.

Мирзаҳмат ШАИМОВ, сенатор, Ўзбекистон Қаҳрамони:

— Эрталабдан Ширин шаҳри сайловчилари ҳам ўзлари танлаган номзодларга овоз бериш учун сайлов участкаларига келди. Барча шароитлар яратилгани учун сайловчилар байрамона кайфиятда. Янгиланаётган Ўзбекистон учун сайловчилар, халқимиз ўз номзодларини кўрсатишга масъулият билан ёндашиб, юртимиз келажаги учун бефарқ эмаслигини намоён этди.

Мен ҳам барча оила аъзоларимиз билан бирга Ширин шаҳридаги 277-сайлов участкасига келдим. Ўзим муносиб кўрган, эртанги кунимизни, ёрқин ҳаётимиз ва фаровон турмушимизни таъминлаш йўлида халқчил қонунларнинг яратилишида хизмат кўрсатишга қодир бўлган номзодларга овоз бердим.

Энди сайланаётган номзодларимизга халқ хизмати йўлида, муаммо ва келажак масалаларини оқилона ҳал этилишида фаол иштирок этишини тилаган ҳолда, миллий қадриятларимиз ва ҳурриятимиз учун курашда куч-ғайрат тилайман.

Ҳасан НОРМУРОДОВ, “Нуроний” жамғармаси Самарқанд вилояти бўлими раиси, Ўзбекистон Қаҳрамони:

– “Янги Ўзбекистон – янги сайловлар” шиори остида ўтказилган бу йилги сайловларга тайёргарлик ва овоз бериш жараёнлари ҳар қачонгидан ўзгача, юқори савияда ўтганини барчамиз кўрдик. Бу аввало сайловнинг янги қонунчилик, яъни Ўзбекистон Республикаси Сайлов кодекси асосида ўтгани билан боғлиқ. Қолаверса, кейинги йилларда мамлакатимизда амалга оширилаётган кенг кўламли ислоҳотлар давлат ва жамият ҳаётида, халқимиз турмуш тарзида ҳам ўз аксини топмоқда. Буни сайловда иштирок этган номзодлар ва сайловчилар юракдан ҳис қилди.

Ўзим ҳам 1956 йилдан буён сайловларда иштирок этаман. Бу борада 63 йиллик тажрибага эга инсон сифатида айтишим мумкинки, жорий йилги сайловлар аввалгилардан тубдан фарқ қилди. Ва бу сайлов натижалари давлатимиз тараққиёти ва халқимиз фаровонлигига хизмат қилишига ишонаман.

 

ЎзА


Фикр ва мулохазалар

Защита от автоматических сообщений

Сўнгги янгиликлар: