Ўзбекистон Миллий матбуот марказида «Ёш сиёсатчи — 2018» кўрик-танловининг Тошкент шаҳар босқичи ўтказилди. Унда 12 нафар интилувчан ёш уч шарт асосида беллашди.

—            Юртимизда ёшларни ҳар томонлама етук, салоҳиятли инсонлар этиб вояга етказиш масаласи давлат сиёсати даражасига кўтарилган, — деди ЎзХДП Тошкент шаҳар кенгаши раиси Ҳайдар ­Бобохонов. — Бу жараёнда давлат ташкилотлари билан бир қаторда жамоат ташкилотлари, хусусан, сиё­сий партиялар зиммасига ҳам улкан масъулият юкланади. Партия­мизнинг ёш аъзолари ижтимоий-иқтисодий ва сиёсий билимини оширишда «Ёш сиёсатчи» кўрик-танлови муҳим аҳамият касб этмоқда...

Биринчи шартда иштирокчилар беш дақиқа давомида ўз лойиҳаларини тақдим этишди.

— Республикамизда эҳтиёжманд оила вакилларига, ногиронлиги бўлган шахсларга кўмаклашадиган хайрия жамғармалари фаолият юритади, — деди танлов иштирокчиси Музаффар Ҳабибуллаев. — Аммо улар тасарруфидаги маблағ барча ногиронлиги бўлган шахсларнинг эҳтиёжларини қондириш учун етмайди. Демак, иложи борича уларнинг бандлигини таъминлаш лозим. Уларни касб-ҳунарга тайёрлаш ҳам муҳим вазифа саналади. Лойиҳамда махсус ўқув курс­лари очишни режалаштирганман. Курсларда замонавий касб­ларга ўқитишни мўлжаллаганман.

Қолган икки шарт ҳам қизғин баҳсларга бой тарзда ўтди.

Якуний натижаларга кўра, Шайхонтоҳур туманидан Абдураҳим ­Пардаев учинчи, Яккасарой туманидан Музаффар Хабибуллаев ­иккинчи ўринни қўлга ки­ритди. Юнусобод туманидан Шаҳноза ­Тошқулова биринчи ўринни эгаллади ва танловнинг Республика босқичида иштирок этадиган бўлди.

Сирожиддин ШОНАЗАРОВ