Навоий вилоятининг Кармана туманидаги «Камолот» маҳалласида янги тикув цехи иш бошлади. Тижорат банкининг имтиёзли кредити эвазига 8 тикув машинаси харид қилиниб, 6 нафар хотин-қиз иш билан таъминланди. Бу ерда 12 турдаги кийим-кечак тайёрланмоқда.

— Анча вақтдан буён ўзимга мос иш ахтараётган эдим, — дейди Мухлиса Рўзиева. — Маҳалламизда цех очилиб, мақсадимга етдим. Ҳозир аёллар ва болалар либосларини тикаяпман.

 Йил охиригача корхона фаолияти кенгайтирилиб, иш ўринлари сони 16 тага етказилиши режалаштирилган.

— Ўтган йили туманимизда 4900 иш ўрни яратилди, — дейди халқ депутатлари Нав­баҳор туман Кенгаши депутати Гулчеҳра Рўзиева. — Шундан 3334 таси кичик бизнес ва хусусий тадбиркорлик субъектлари ҳиссасига тўғри келади. Маҳаллаларда кичик корхоналарнинг ташкил этилиши эса аҳоли бандлигини таъминлашда муҳим аҳамият касб этмоқда.

Илҳом САТТОРОВ,

«Ўзбекистон овози» мухбири.